Monk setti Gylfa á bekkinn og Swansea tapaði á heimavelli

Garry Monk var með íslenska landsliðsmanninn Gylfa Þór Sigurðsson á varamannabekknum þegar Swansea City tapaði 1-0 á heimavelli á móti Stoke í lokaleik níundu umferðar ensku úrvalsdeildarinnar í kvöld.

Gylfi var búinn að vera í byrjunarliðinu í átta fyrstu leikjum Swansea en það fór ekki milli mála að Swansea saknaði hans í fyrsta klukkutíma leiksins.

Bojan skoraði eina markið úr vítaspyrnu strax á fjórðu mínútu leiksins og tryggði Stoke þar með þriðja deildarsigur sinn í röð.

Swansea City byrjaði tímabilið vel en hefur nú aðeins náð í samtals tvö stig út úr síðustu fimm leikjum sínum.

Gylfi Þór Sigurðsson átti ágæta innkomu í lið Swansea síðustu þrjátíu mínútur leiksins og átti meðal annars frábært skot rétt framhjá marki Stoke en velska liðinu tókst ekki að ná inn jöfnunarmarki og varð að sætta sig við tap.

Spánverjinn Bojan fiskaði vítaspyrnu á Ashley Williams strax á fjórðu mínútu leiksins og skoraði sjálfur af öryggi úr spyrnunni.

Swansea átti mjög slakan fyrri hálfleik en þrátt fyrir það var Stoke-liðið ekki að skapa mikið eftir markið.

Jack Butland, markvörður Stoke, slapp með skrekkinn á 19. mínútu eftir að hafa misst boltann klaufalega frá sér og renndi sér síðan í hann með sólann á undan. Butland komst í boltann á undan André Ayew og náði að bjarga sér þótt að margir hafi nú sett spurningamerki við lögmæti tæklingarinnar.

Jonjo Shelvey fékk gott tækifæri til að jafna metin á 58. mínútu en skot hans fór undir Jack Butland markvörð og í innanverða stöngina og út.

Skömmu síðar skipti Garry Monk Gylfa Þór inn á fyrir Modou Barrow.

Austurríkismaðurinn Marko Arnautovic fékk mjög gott færi til að auka muninn á 68. mínútu og aðeins rúmri mínútu síðar átti Gylfi frábært skot sem fór rétt framhjá samskeytunum.

Swansea náði ekki að ógna marki Stoke nægilega mikið á lokamínútunum og varð að sætta sig við súrt tap á heimavelli.