Mohammed Morsi dæmdur til dauða

Mohammed Morsi, fyrrverandi forseti Egyptalands, hefur verið dæmdur til dauða vegna flótta fjölda manna úr fangelsi árið 2011. Áður hafði Morsi verið dæmdur í tuttugu ára fangelsi fyrir handtökur og pyntingar mótmælenda á meðan hann var við völd.

Trúarleg yfirvöld Egyptalands munu nú gefa álit á því hvort fylgja eigi dómnum eftir, en álitið er þó ekki bindandi.

Morsi var steypt af stóli af hernum árið 2013 eftir gífurlega umfangsmikil mótmæli gegn stjórn hans. Samtök hans, Múslímska bræðralagið hafa verið bönnuð og þúsundir stuðningsmanna hans hafa verið handteknir samkvæmt BBC.

Stuðningsmenn Morsi segja málaferlin gegn honum vera keyrð áfram af pólitískum andstæðingum hans og séu tilraun til að gefa valdaráni hersins réttmæti. Sjálfur hefur Morsi neitað að samþykkja vald dómstólsins yfir sér.

Morsi var fyrsti lýðræðislegi kjörni stjórnandi Egyptalands, en á innan við ári eftir að hann tók völd hófust mikil mótmæli gegn stjórn hans. Þá hafði Morsi veitt sjálfum sér gífurleg völd við stjórn landsins.