Shevchenko stendur með Mourinho

Jose Mourinho, stjóri Chelsea, á ekki bara óvini heldur líka vini sem standa nú með honum á erfiðum tímum.

Einn þeirra er Úkraínumaðurinn Andriy Shevchenko sem lék undir stjórn Mourinho hjá Chelsea á sínum tíma. Hann segir að Chelsea eigi ekki að reka Mourinho heldur standa við bakið á honum.

„Jose er frábær stjóri. Ég hef unnið með mörgum mismunandi þjálfurum en aðalatriðið er alltaf að ná árangri og hann hefur margoft sýnt að hann er sigurvegari," sagði Shevchenko.

„Hann hefur líka mikla reynslu og veit hvað er í gangi hjá liðinu. Hann veit hvað þarf að bæta en stundum tekur það tíma. Þetta er sigursælasti stjóri heims síðustu 10 ár. Ég efast ekki um að hann sé rétti maðurinn til þess að gæða liðið lífi á nýjan leik."

Mourinho er sagður vera afar valtur í sessi og líklegustu eftirmenn eru sagðir vera Guus Hiddink eða Carlo Ancelotti.