Monk stýrir Gylfa áfram

Enskir fjölmiðlar greina frá því í kvöld að Garry Monk verði ekki rekinn úr starfi knattspyrnustjóra Swansea á næstunni. Hann muni stýra liðinu sínu liði er það mætir Bournemouth eftir landsleikjafríið.

Monk hefur verið talinn valtur í sessi en undir hans stjórn hefur Swansea aðeins unnið einn af síðustu átta leikjum sínum. Gylfi Þór Sigurðsson er á mála hjá Swansea.

Sjá einnig: Gylfi Þór gæti fengið nýjan stjóra

Huw Jenkins, stjórnarformaður Swansea, er sagður styðja Monk og The Guardian greinir frá því kvöld að hann hafi átt gott samtal við Monk eftir 1-0 tapið gegn Norwich um helgina. Jenkins telur enn að Monk geti snúið gengi liðsins við.

Sjá einnig: Lærisveinar Gauja Þórðar standa saman

Swansea varð í áttunda sæti ensku úrvalsdeildarinnar á síðustu leiktíð og Monk var verðlaunaður með nýjum þriggja ára samningi. Liðið hefur þó ekki náð að fylgja eftir þessu góða gengi í haust en þrátt fyrir það er ekki talið að starfið sé að veði fyrir Monk í leiknum gegn Bournemouth.