Chelsea vinnur upp 11 stiga forskot United og hirðir af því Meistaradeildarsætið

Paul Merson, fyrrverandi leikmaður Arsenal og Aston Villa sem starfað hefur lengi sem knattspyrnusérfræðingur Sky Sports, telur að Manchester United nái ekki Meistaradeildarsæti í ensku úrvalsdeildinni.

Merson opinberar hvaða lið hann telur að hafni í efstu fjórum sætunum á vefsíðu Sky Sports í dag, en að hans mati eru það Manchester City, Arsenal, Tottenham og Chelsea.

Manchester City og Arsenal eru í efstu tveimur sætunum með 26 stig, United í fjórða sæti með 24 stig og Tottenham sæti neðar með 21 stig þegar tólf umferðir eru búnar af deildinni.

Chelsea er aftur á móti í stórkostlegum vandræðum með aðeins ellefu stig í 16. sæti, þremur stigum frá fallsæti en þrettán stigum frá Meistaradeildarsæti.

Frábær tapleikur Chelsea

„Ég get ekki gert upp á milli Manchester City og Arsenal. City mætir ekki alltaf til leiks gegn minni liðunum eins og sást á sunudaginn gegn Aston Villa. Ef ég þarf að velja annað hvort liðið spái ég City titlinum,“ segir Merson um City og Arsenal.

„Ég veit að þetta kemur fólki á óvart,“ segir hann um ákvörðun sína að spá Tottenham þriðja sætinu.

„Tottenham hefur komið mér á óvart og algjörlega breytt skoðun minni á liðinu. Það sem liðið gerði á Emirates-vellinum var magnað. Þetta er ungt lið með góðan stjóra en til þess að liðið nái þetta langt þurfa lykilmenn að haldast heilir,“ segir Merson.

Chelsea tapaði, 1-0, gegn Stoke í síðustu umferð en þar fannst Merson liðið spila frábærlega. „Ef Chelsea spilar áfram eins og það gerði gegn Stoke vinnur það fullt af fótboltaleikjum. Ég veit það hljómar kjánalega fyrst liðið tapaði en frammistaða liðsins var bara mun betri en áður,“ segir Merson.

„Á sama tíma leit United aldrei út fyrir að geta skorað gegn WBA þar til Jesse Lingaard bjargaði liðinu með frábæru marki. Chelsea þarf að vinna upp fullt af stigum en ég sé það fara á flug á meðan United getur gert of mörg jafntefli,“ segir Paul Merson.