Kanínur og kjúklingar mæla eiturgufur

Kínversk yfirvöld hafa komið fyrir búrum með kanínum, dúfum og kjúklingum í nálægð við staðinn þar sem gífurleg sprenging átti sér stað í Tianjin-borg þann 12. ágúst sl. Markmiðið er að slá á ótta um að eiturgufur liggi í loftinu.

Borgaryfirvöld í Tianjin hafa þráfaldlega haldið því fram að eiturefni sem finna megi í borginni í kjölfar sprengingarinnar séu ekki í það miklu magni að íbúum borgarinnar stafi hætta af. Dýrin voru á staðnum í tvo tíma og lifðu af.

Íbúar hafa miklar áhyggjur af langtímaáhrifum af þeim eiturefnum sem leistust úr læðingi í sprengingunni. Yfirvöld hafa staðfest að meira en 700 tonn af natríumblásýrusalti hafi verið geymt í vöruhúsinu sem sprakk í loft upp.

Ríkisfjölmiðlar í Kína birtu í gær myndir af þúsundum dauðra fiska sem skolað hafði upp á árbakka í sex kílómetra fjarlægð frá staðnum þar sem sprengingin átti sér stað. Borgaryfirvöld hafa hinsvegar gefið það út að engin tengsl sé á milli dauða fiskanna og sprengingarinnar, fiskarnir hafi drepist vegna súrefnisskorts, ekki vegna mengunar vegna sprengingarinnar.