Undirskriftasöfnuninni lokið: 51.296 skrifuðu undir

Undirskriftasöfnun Þjóðareignar lauk nú á miðnætti. Alls rituðu 51.296 Íslendingar nafn sitt á listann, þar sem skorað er á forseta Íslands að vísa í þjóðaratkvæðagreiðslu hverjum þeim lögum sem fiskveiðiauðlindum er ráðstafað til meira en eins árs, meðan ekkert ákvæði um þjóðareign á auðlindum hefur verið sett í stjórnarskrá.

Söfnunin er sú fjórða stærsta í sögunni og var hrundið af stað í kjölfar makrílfrumvarps sjávarútvegsráðherra hinn 1. maí síðastliðinn. Aðstandendur hennar segja áskorunina þó ekki beint gegn frumvarpinu sérstaklega, nauðsynlegt sé að setja ákvæði í stjórnarskrá um þjóðareign á auðlindum.

Ekki tókst að afgreiða frumvarpið fyrir þinglok.