Kallström meiddist illa á baki á fyrstu æfingu

Það er óhætt að kalla þetta matraðarbyrjun en Kim Kallström, nýr leikmaður Arsenal, meiddist illa á sinni fyrstu æfingu með félaginu í dag og gæti verið frá í tvo til þrjá mánuði.

Kim Kallström kom til Arsenal í gær á láni frá rússneska liðinu Spartak Moskvu en hann átti að leysa af miðjumennina Aaron Ramsey og Jack Wilshere sem eru meiddir auk þess að Mathieu Flamini er í banni

Sænska blaðið Aftonbladet hefur heimildir fyrir því að Kim Kallström hafi meiðst illa á fyrstu æfingu sinni með félaginu en Arsenal hefur enn ekki staðfest þessar fréttir. BBC hefur heimildir fyrir því að þetta séu bakmeiðsli.

Kallström er 31 árs gamall og er þekktastur fyrir tíma sinn hjá franska liðinu Lyon en hann hefur spilað yfir hundrað landsleiki fyrir Svía.

Læknalið Arsenal er að skoða Kim Kallström og það er því ekki enn ljóst hversu alvarleg meiðslin eru þótt að þetta líti ekki vel út.

Þetta er áfall fyrir Arsenal-liðið en Kim Kallström var eini leikmaðurinn sem bættist í leikamannahópinn í þessum félagsskiptaglugga. Næsti leikur liðsins er á móti Crystal Palace á morgun.