Moyes: Veit ekki hvað við þurfum að gera til þess að vinna

David Moyes, knattspyrnustjóri Manchester United var að sjálfsögðu sár og svekktur eftir að liðið tapaði 1-2 á móti Stoke City í ensku úrvalsdeildinni í dag en þetta var áttunda deildartap liðsins á tímabilinu.

„Ég veit ekki hvað við þurfum að gera til þess að vinna leiki," sagði David Moyes við BBC.

„Í dag vorum við einstaklega óheppnir. Við spiluðum vel við erfiðar aðstæður en við töpuðum vegna tveggja sérstakra skota, það fyrra sem breytti skelfilega um stefnu og það seinna sem var í heimsklassa," sagði Moyes.

„Við hefðum samt átt að vera búnir að vinna þennan leik fyrir löngu miðað við öll færin sem við fengum í leiknum. Við getum því bara kennt okkur sjálfum um það hvernig fór," sagði Moyes.

Manchester United var í stórsókn og fékk fjölda færa en gat bara ekki komið boltanum almennilega á markið. Þegar það tókst loksins hjá Wayne Rooney úr aukaspyrnu undir lokin þá varði Asmir Begović boltann glæsilega í stöngina.