Graham Poll um Suarez: Draumur Púlara en martröð dómara

Knattspyrnudómarinn Graham Poll skrifaði pistil í Daily Mail í dag þar sem að hann tók fyrir Luis Suarez, framherja Liverpool en Úrúgvæmaðurinn tefldi einmitt á tæpasta vað í stórleiknum á móti Manchester City um helgina.

Luis Suarez fékk spjald snemma leiks og var ansi nálægt því að krækja sér í annað gult spjald og þar með rautt þegar sjónvarpsvélarnar sýndu hann reyna að fiska brot á leikmenn City.

Graham Poll segir að Luis Suarez sé vandamál frá sjónarhorni knattspyrnudómara enda láti hann sig alltaf falla þegar hann á ekki möguleika á því að skora og kalli um leið á stóra ákvörðun frá dómaranum.

„Ef Luis Suarez spilaði fyrir liðið mitt þá myndi ég elska hann," skrifar Graham Poll og hrósar ennfremur úrúgvæska framherjanum fyrir hæfileika sína.

Graham Poll segir Suarez skapa sér óvinsælir með því að vera alltaf sárhneykslaður þegar dæmt sé á hann og að hann telur sig aldrei gera neitt rangt. Inntakið í pistli hans sem má lesa hér er að Suarez er draumur Púlara en martröð dómara.