Misstir þú af mörkum helgarinnar í enska? - allt hér inn á Vísi

Þeir sem misstu af enska boltanum um helgina eða vilja bara horfa á það helsta aftur þá er hægt að fá flott yfirlit inn á Vísi. Eins og vanalega er nefnilega hægt að finna margskonar samantektir eftir hverja umferð ensku úrvalsdeildarinnar inn á Sjónvarpsvefnum á Vísi.

Liverpool vann 3-2 sigur á Manchester City í toppslagnum og hélt áfram sigurgöngu sinni en hefur þó bara tveggja stiga forskot á Chelsea sem vann 1-0 útisigur á Swansea City.

Bítlaborgarliðin eru á miklu skriði því Everton vann 1-0 sigur á Sunderland, hefur þar með unnið sjö leiki í röð og náð tveggja stiga forskoti á Arsenal í baráttunni um fjórða og síðasta sætið inn í Meistaradeildina.

Með því að smella á myndbandið fyrir ofan má sjá yfirlit yfir leiki sunnudagsins þar á meðal sigra Liverpool og Chelsea en með því að smella hér er hægt að sjá það helsta sem gerðist í leikjum laugardagsins.

Umferðinni lýkur ekki fyrr en á þriðjudagskvöldið þegar Arsenal tekur á móti West Ham en Arsenal var upptekið við að tryggja sér sæti í bikarúrslitaleiknum um helgina.