Terry: Við vildum að Liverpool ynni Man. City

John Terry, fyrirliði Chelsea, var bara nokkuð ánægður með sigur Liverpool á Manchester City í ensku úrvalsdeildinni í gær. Demba Ba tryggði Chelsea 1-0 sigur á Swansea seinna um daginn og Terry og félagar eru því tveimur stigum á eftir toppliði Liverpool.

„Við vissum augljóslega um úrslitin úr Liverpool-leiknum og þetta voru líklega úrslitin sem við óskuðum okkur," sagði John Terry við Sky Sports.

„Við unnum okkar leik og pressan er enn á liðunum fyrir ofan og neðan okkur. Við vissum að við myndum gera þeim erfitt fyrir með því að vinna okkar leiki hvernig sem leikurinn á Anfield hefði farið," sagði Terry.

Terry þakkaði þolinmæðinni að Chelsea náði inn sigurmarkinu en liðið lék manni fleiri stærsta hluta leiksins.

Chelsea á eftir deildarleiki á móti Sunderland, Liverpool, Norwich og Cardiff en ólíkt hinum tveimur liðunum í titilbaráttunni þá á Chelsea einnig tvo undanúrslitaleiki í Meistaradeildinni í aprílmánuði þar sem liðið mætir spænska liðinu Atletico Madrid.