Manchester-liðin slást um Carvalho

Manchester City hefur blandað sér í baráttuna um portúgalska miðjumanninn William Carvalho sem hefur verið sterklega orðaður við Manchester United að undanförnu.

Carvalho er 21 árs gamall varnarsinnaður miðjumaður. Hann fæddur í Angóla en hefur leikið tvo landsleiki fyrir Portúgal og er líklegur til að vera valinn í hóp liðsins fyrir heimsmeistaramótið í Brasilíu í sumar.

Carvalho er metinn á 38 milljónir evra en hann hefur ekki viljað gefa upp hvert hann vilji helst fara fari hann frá Sporting Lissabon á annað borð. Talið er þó að hann vilji spreyta sig í Meistaradeild Evrópu.

„Það er gott að vera hrósað og ég veit að stór lið hafa áhuga á mér.  Það er frábært að vera orðaður við frábær evrópsk lið en í augnablikinu einbeiti ég mér að ferli mínum hjá Sporting og reyni að gera mitt besta til loka tímabilsins,“ sagði Carvalho um stöðu mála hjá sér nýlega.

„Við sjáum til hvað gerist eftir tímabilið.“