Launakostnaðurinn í ensku úrvalsdeildinni jókst um 24 milljarða

Tekjur félaganna í ensku úrvalsdeildinni fyrir skatt á tímabilinu 2012/2013 numu ríflega 2,5 milljörðum punda (475 milljörðum króna) í fyrsta skipti en það er aukning upp á 21 prósent. Þetta kemur fram í árlegri skýrslu Deloitte um fjármál í fótboltaheiminum.

Félögin gátu þó ekki setið á gullinu því yfir 75 prósent af 2,5 milljörðunum fóru beint í laun leikmanna. Launin hækkuðu um 125 milljónir punda (24 milljarða króna) eða átta prósent.

Þau voru 1,8 milljarður punda tímabilið 2012/2013 sem er nýtt met í ensku úrvalsdeildinni.

Aukinn launakostnaður varð til þess að heildartekjur félaganna voru tveimur milljónum punda lægri en árið áður en þær fóru úr 84 milljónum punda í 82 milljónir.

Samt sem áður komu þrettán félög af tuttugu út í hagnaði eftir tímabilið sem er þremur fleiri en árið áður.

Adam Bull, yfirmaður hjá Deloitte, segir að launakostnaðurinn muni halda áfram að aukast og það sjáum við þegar nýafstaðið tímabil verði gert upp á næsta ári.

„Hærri launakostnaður er bein afleiðing hærri tekna félaganna vegna sjónvarpssamninga. Aftur á næsta ári munu 60 prósent af auknum tekjum félaganna renna beint í launakostnað.“

„Miðað við það gerum við ráð fyrir að enska úrvalsdeildin setji aftur nýtt met á næsta ári í launakostnaði og hann verði um 2,2 milljarðar punda,“ segir Adam Bull.