Barton gefur kost á sér í enska landsliðið

Joey Barton, leikmaður QPR, hefur gefið kost á sér í enska landsliðið á ný en hann telur sig eiga raunhæfan möguleika á landsliðssætinu.

Barton tilkynnti formlega í maí í fyrra að hann væri hættur að spila með landsliðinu. Hann á reyndar aðeins einn leik að baki og spilaði um stundarfjórðung í honum.

„Ég hef ákveðið að draga fyrri ákvörðun mína til baka eftir að hafa horft á enska landsliðið spila á HM,“ sagði Barton sem starfaði sem sérfræðingur fyrir Eurosport á meðan keppninni stóð.

„Ég tel það mögulegt miðað við gæðin sem eru í liðinu. Ég tel að ég sé betri leikmaður í dag en þegar ég var í landsliðinu.“

„Fólk heldur kannski að mér sé ekki alvara. Treystið mér, mér er fyllilega alvara. Það er það eina sem ég ætla að segja um málið að svo stöddu.“