Gylfi talar vel um Brendan Rodgers

Gylfi Þór Sigurðsson segir að framganga þeirra Luis Suarez og Daniels Sturridge sé lykilatriði í velgengni Liverpool í vetur. Gylfi, sem leikur með Tottenham, sagði þetta í samtali við vefmiðilinn London24.com í gær.

„Mörkin sem þeir hafa skorað og leikstíll þeirra hefur fært liðinu mikið sjálfstraust,“ sagði Gylfi en liðin eigast við á Anfield á sunnudag. Hann hrósaði einnig knattspyrnustjóranum Brendan Rodgers, sem Gylfi starfaði með hjá Swansea og Reading á sínum tíma.

„Handbragð Rodgers er á liðinu. Liðið er gríðarlega sterkt, bæði í vörn og sókn, eins og það hefur verið að spila að undanförnu,“ segir Gylfi.

Liverpool vann 5-0 sigur á Tottenham á White Hart Lane fyrr í vetur og Gylfi vill bæta fyrir það. „Við viljum vinna hvern leik og það á sérstaklega vel við núna. Okkar takmark er að fá eins mörg stig og við getum og væri mikilvægt að ná minnst einu stigi – ef ekki öllum þremur.“

Gylfi skoraði sigurmark sinna manna gegn Southampton um helgina og fær vonandi tækifæri í byrjunarliðinu á sunnudag.