Eto'o sagður pirraður út í Mourinho

Claude Le Roy, fyrrum landsliðsþjálfari Kamerún, staðhæfir að Samuel Eto'o sé ekki ánægður með ummæli Jose Mourinho.

Mourinho, sem er knattspyrnustjóri Eto'o hjá Chelsea, gantaðist með aldur sóknarmannsins í einkasamtali í síðustu viku. Ummælin náðust á upptöku og voru birt á mánudaginn.

Le Roy var í viðtali á CanalPlus sjónvarpsstöðinni í gær og sagðist hafa rætt við Eto'o um málið.

„Ég var að tala við hann í síma og hann er mjög pirraður. Mourinho kom reyndar að máli við hann fyrirfram og sagði honum að trúa ekki neinu af því sem kæmi fram,“ sagði Le Roy. „En ég get sagt ykkur að Samuel var ekki hrifinn af þessu.“

Mourinho sagði að fjölmiðlamenn ættu að skammast sín fyrir að CanalPlus hafi birt ummæli sem voru látin falla í einkasamtali.

Forráðamenn stöðvarinnar svöruðu honum fullum hálsi. „Þetta var ekki leynileg upptaka. Myndavélin var ekki langt í burtu. Rauða ljósið sást greinilega og hann var fyllilega meðvitaður um að verið væri að taka upp.“