Mourinho ætlar ekki að þiggja matarboð Mancini

Jose Mourinho, stjóri Chelsea, hafði lítinn áhuga á að þekkjast boð Roberto Mancini um að borða saman eftir leik liðsins gegn Galatasaray á morgun.

Mancini og lærisveinar hans í Galatasary mæta á Stamford Bridge á morgun en liðin eigast þá við í síðari viðureign þeirra í 16-liða úrslitum Meistaradeildar Evrópu. Þeirri fyrri lauk með 1-1 jafntefli í Tyrklandi.

Mancini sagði á blaðamannafundi í dag að hann vildi bjóða Mourinho í mat eftir leik ef honum myndi lykta með sigri Galatasaray.

Mourinho var spurður út í ummælin og hvort hann hefði áhuga á að taka þessu rausnarlega boði. Svar hans var einfalt.

„Nei. Ég hef ekki áhuga á því. Ég geri það sem ég vil gera eftir leiki, hvort sem við töpum eða vinnum,“ sagði Mourinho.

„Ég ætla ekki að borða með einhverjum sem á það eitt sameiginlegt með mér að vera knattspyrnustjóri.“

Það hefur verið grunnt á því góða á milli Mourinho og Mancini eftir að Portúgalinn tók við Mancini sem knattspyrnustjóri Inter árið 2008. Mancini sagði að hann hefði átt þátt í sigri Inter í Meistaradeild Evrópu árið 2010.