Draumabyrjun Giggs

Ryan Giggs fékk heldur betur óskabyrjun sem stjóri Manchester United, en lið hans bar sigurorð af Norwich með fjórum mörkum gegn engu á Old Trafford í dag.

Giggs fékk frábærar viðtökur þegar hann kom til leiks, í fyrsta skipti sem stjóri félagsins sem hann hefur leikið allan sinn feril með.

Eitthvað hefur Giggs gert rétt því hans menn spiluðu mjög góðan leik. Wayne Rooney skoraði fyrstu tvö mörk United, það fyrra úr vítaspyrnu á 41. mínútu og það síðara með skoti fyrir utan vítateig á 48. mínútu.

Spánverjinn Juan Mata kom inn á sem varamaður eftir klukkustundar leik og skoraði seinni tvö mörkin með tíu mínútna millibili eftir fyrirgjafir frá Phil Jones og Antonio Valencia.

United situr enn í 7. sæti, nú með 60 stig, en Norwich er í mikilli fallhættu. Liðið er í 17. sæti, aðeins einu stigi á undan Fulham sem situr í sætinu fyrir neðan.

Mörkin úr leiknum má sjá í spilaranum hér að ofan.