Gerrard: Látið Brendan Rodgers fá langan samning

Steven Gerrard, fyrirliði Liverpool, vill að eigendur félagsins hafi nú fljótar hendur og framlengi sem fyrst við knattspyrnustjórann Brendan Rodgers. Gerard vill að Rodgers verði lengi á Anfield.

Brendan Rodgers á aðeins rúmlega eitt ár eftir af samningi sínum við Liverpool en hefur reyndar heimild til að framlengja hann síðan enn frekar um tólf mánuði.

Gerrard vill hinsvegar sjá stjórann sinn fá miklu lengri samning og þar með tækifæri til að halda áfram uppbyggingu sinni á Anfield.

„Brendan hefur breytt miklu fyrir okkur. Hann er hægt og rólega að breyta leikskipulaginu og gera litlar breytingar á leikmannahópnum og þetta er að ganga upp hjá honum," sagði Steven Gerrard við SkySports um þennan 41 árs gamall Norður-Íra.

„Hann er ungur þjálfari sem vann sér það inn að fá að taka við Liverpool. Hann er að alltaf að bæta sig og hefur verið ferskur blær inn í þetta fótboltafélag," sagði Gerrard.

„Ég læri af honum á hverjum degi. Hann hefur reynst mér frábærlega og ég er viss um að aðrir leikmenn hafi sömu sögu að segja. Hann á skilið langan samning og er fullkominn fyrir þetta félag," sagði Gerrard.