Hull City fær ekki að breyta nafni félagsins

Enska knattspyrnusambandið mun að öllum líkindum banna Hull City að breyta nafni félagsins í Hull Tigers en eigandi Hull City sótti um nafnabreytingu sem átti að taka gildi fyrir næsta tímabil.

Enski fjölmiðlar fjalla um málið í morgun og samkvæmt þeirra umfjöllun bendir allt til þess að það verði engir Tígrar í ensku úrvalsdeildinni á næstu leiktíð.

Margir stuðningsmenn Hull City voru ósáttir með nafnabreytingu eigandans Assem Allam en hann hefur hótað því að selja félagið fá hann ekki að breyta 110 ára gömlu nafni félagsins.

Sérstök ráðgjafanefnd enska knattspyrnusambandsins er á móti nafnabreytingunni og það þykir ekki líklegt að forráðamenn enska knattspyrnusambandsins fari gegn hennar skoðun.

Hull City er eins og er í þrettánda sæti ensku úrvalsdeildarinnar en félagið er einnig komið í undanúrslit enska bikarsins þar sem það mætir Sheffield United.