Di Maria ræddi við Ronaldo um mikilvægi sjöunnar hjá United

Angel Di Maria stóð sig vel í dag á fyrsta blaðamannafundinum sem leikmaður Manchester United og hollenski knattspyrnustjórinn Louis van Gaal var augljóslega ánægður með svörin hjá nýjasta og dýrasta leikmanni félagsins.

Louis van Gaal talaði mikið um mikilvægi þess að Angel Di Maria yrði fyrst og fremst góður liðsmaður og öll svör Di Maria voru á þeim nótunum.

Það er mikil pressa á Angel Di Maria enda eyddi Manchester United 59,7 milljónum punda í hann og ef marka má spilamennsku liðsins í upphafi tímabils þá þarf liðið sárlega á vítamínssprautu að halda.

Angel Di Maria mun verða í sjöunni hjá Manchester United og fetar þar í fótspor margra af farsælustu leikmönnum félagsins í gegnum tíðina.

Það kom líka fram á blaðamannafundinum að Angel Di Maria hafi talað við Cristiano Ronaldo um mikilvægi sjöunnar á Old Trafford áður en hann yfir gaf Santiago Bernebau.

„Cristiano Ronaldo talaði við mig í Madrid og útskýrði það fyrir mér hversu mikilvæg sjöan er hjá Manchester United. Ég vonandi get staðið undir því að spila í númer sjö," sagði Angel Di Maria á blaðamannafundinum.