Báru kennsl á bein eins nemanda

Réttarmeinafræðingar eru búnir að bera kennsl á jarðneskar leifar nemanda sem hvarf í Guerrero-fylki í Mexíkó í september. Fjörutíu og þrír nemar hurfu sporlaust og hefur þeirra verið leitað logandi ljósi síðan.

Það voru glæpamenn sem bentu yfirvöldum á líkamsleifarnar, bein sem fannst á ruslahaugum, en þau voru send til Austurríkis til greiningar.

Nemendurnir voru hinn 27.september við mótmæli í Iguala í Guerrero þegar þeir voru handteknir og hafa þeir ekki sést síðan. Spilling er sögð einkenna lögregluna en talið er að lögregla hafi komið nemunum til glæpamenna í kjölfar handtökunnar sem svo tóku þá af lífi. Stjórnvöld í Mexíkó hafa sætt mikilli gagnrýni vegna málsins og víða hefur komið til mótmæla.