Tvö mörk á tveimur mínútum felldu Japani

Fílabeinsströndin vann góðan sigur á Japan, 2-1, í C-riðli heimsmeistarakeppninnar í fótbolta í nótt, en leikurinn fór fram í borginni Recife.

Japan var miklu betra liðið í fyrri hálfleik og var með verðskuldaða 1-0 forystu eftir hann. Mark Japana var einkar glæsilegt en það skoraði AC Milan-maðurinn KeisukeHonda.

Honda fékk boltann í teignum og lék á varnarmann með fyrstu snertingu og þrumaði svo boltanum með annarri snertingu í netið, óverjandi fyrir BoubacarBarry í marki Fílabeinsstrandarinnar.

Mörkin hefðu getað verið fleiri en Fílbeinsstrendingar sluppu með skrekkinn í fyrri hálfleik. Það borgaði sig líka því í þeim síðari tryggðu þeir sér sigurinn með tveimur mörkum á tveggja mínútna kafla.

Mörkin voru nánast alveg eins og arkitektinn í bæði skiptin var hægri bakvörðurinn SergeAurier sem leikur með Toulouse í Frakklandi.

Á 64. mínútu gaf hann hnitmiðaða fyrirgjöf frá hægri, beint á kollinn á markahróknum WilfriedBony, leikmanni Swansea í ensku úrvalsdeildinni, sem stýrði knettinum glæsilega í fjærhornið.

Tveimur mínútum síðar gaf Aurier aðra sendingu fyrir markið af nánast nákvæmlega sama stað og nú var það Gervinho sem rak höfuðið í knöttinn.

Hann skallaði boltann á nærstöngina þar sem EijiKawashima, markvörður Japana, var mættur en honum tókst ekki að verja. Kawashima hefði átt að gera betur.

Didier Drogba byrjaði leikinn á varamannabekknum en hann kom inn á í hálfleik og breytti spilamennsku Fílabeinsstrandarinnar sem spilaði mun betur í seinni hálfleiknum og vann verðskuldaðan sigur á endanum. Drogba verður ekki geymdur meira á bekknum eftir þessa innkomu.

Fílabeinsströndin er eftir fyrstu umferð C-riðils í öðru sæti með þrjú stig en Kólumbía er í efsta sæti á markatölu eftir 3-0 sigur á Grikklandi.