Erfitt að komast aftur inn í Meistaradeildina

Draumur Man. Utd um að komast í Meistaradeildina á næsta tímabili verður fjarlægari með hverjum leiknum. Stjóri Liverpool, Brendan Rodgers, hefur tjáð Man. Utd að það geti haft sínar afleiðingar að komast ekki þangað.

"Bestu leikmennirnir vilja spila í bestu deildinni. Öll félög lenda því í vandræðum með að fá leikmenn er þau spila ekki í Meistaradeildinni. United veit það rétt eins og öll félög," sagði Rodgers.

Man. Utd hefur verið í Meistaradeildinni alla tíð frá árinu 1996 og þekkir því illa umhverfið utan Meistaradeildarinnar.

"Það er ekkert auðvelt að komast aftur inn. Lið halda alltaf að næsta ár sé þeirra ár. Það gerir félögum erfitt fyrir að vera utan keppninnar."

Man. Utd og Liverpool mætast í dag og þann leik verður Man. Utd að vinna ætli það sér að eiga möguleika á að komast í deild þeirra bestu.