Annað enskt lið á eftir Konoplyanka

Umboðsmaður Úkraínumannsins Yevhen Konyplyanka segir að Liverpool sé ekki eina enska liðið sem hafi áhuga á leikmanninum öfluga.

Konyplyanka, sem er úkraínskur landsliðsmaður, er á mála hjá Dnipro og hefur verið sterklega orðaður við Liverpool í vikunni. En þar með er bara hálf sagan sögð að sögn umboðsmannsins.

„Ég átti langt samtal við stjórnarformann annars ensks úrvalsdeildarfélags í gær,“ sagði umboðsmaðurinn en samkvæmt enskum miðlum er talið að þar hafi hann átt við Arsenal.

„Það eru sterkar líkur á því að Yevhen fari til Englands mjög fljótlega. Hann gæti verið á leið til Liverpool eða annars ensks félags.“

„Ég mun ekki nefna hitt félagið en það sanna kemur ljós í náinni framtíð,“ bætti hann við. Þess má geta að Tottenham er einnig sagt hafa áhuga á kappanum.