Mourinho: Leikstíll West Ham frá 19. öldinni

Jose Mourinho, stjóri Chelsea, sagði West Ham hafa spilað eins og nítjándu aldar lið en þau skildu jöfn í markalausum leik í Lundúnum í gær.

Chelsea átti 39 marktilraunir í leiknum en West Ham aðeins eitt enda var liðið mestmegnis í vörn.

„Þetta er ekki besta deildin í heiminum. Þetta er knattspyrna frá nítjándu öldinni,“ sagði Mourinho eftir leikinn. „Það eina sem hefði dugað til að brjóta niður þennan múr er Black & Decker [verkfæri].“

Af öllum skotunum hjá Chelsea rötuðu „aðeins“ níu á markið. Oscar og Demba Ba áttu skot í markrammann og Adrian í marki West Ham varði vel frá þeim John Terry, Samuel Eto'o og Frank Lampard.

„Það er erfitt að spila fótbolta þegar aðeins annað liðið hefur áhuga á að taka þátt í leiknum. Það er mjög erfitt,“ sagði Mourinho en Chelsea er nú þremur stigum á eftir Manchester City sem kom sér á topp deildarinnar með 5-1 sigri á Tottenham.

Hann viðurkenndi þó að hann hefði skilning á stöðu West Ham. „Ég veit ekki hvort ég hefði gert það sama í stöðu Stóra Sam [Allardyce, stjóra West Ham]. Kannski,“ bætti Mourinho við.

Samantekt úr leiknum má sjá hér efst í fréttinni.