Chelsea tapaði sínum fyrstu stigum á árinu 2014

West Ham náði í mikilvægt stig á Brúnni í kvöld þegar nágrannarnir Chelsea og West Ham gerðu markalaust jafntefli í ensku úrvalsdeildinni í fótbolta. Stórsókn Chelsea skilaði ekki marki og liðið tapaði sínum fyrstu stigum síðan á Þorláksmessu.

Chelsea var búið að vinna fimm deildarleiki í röð og átti möguleika að komast upp fyrir Arsenal í töflunni með tveggja marka sigri. Chelsea er nú þremur stigum á eftir toppliði Manchester City og tveimur stigum á eftir Arsenal.

Oscar átti skot í slá í fyrri hálfleiknum og Adrian varði vel frá bæði John Terry og Samuel Eto'o.

Chelsea var áfram miklu meira með boltann í seinni hálfleiknum en gekk illa að komast í gegnum mannmarga vörn West Ham liðsins. Leikmenn West Ham börðust hetjulega allar 96 mínúturnar og fögnuðu vel unnu stigi í lokin.

Samuel Eto'o hélt að hann hefði skorað sigurmarkið í uppbótartíma en dómari leiksins dæmdi markið af því að Adrian átti eftir að taka aukaspyrnu í eigin teig.

Frank Lampard fékk dauðafæri rétt fyrir leikslok en Spánverjinn Adrian bjargaði einu sinni enn og kórónaði góðan leik sinn.