Mourinho: Kannski er Eto'o 35 ára - hver veit?

Franska sjónvarpsstöðin Canal Plus tók upp samtal Jose Mourinho við svissneskan úraframleiðanda og birti í gær.

Mourinho, sem er knattspyrnustjóri Chelsea, var að tjá sig um sóknarvandræði liðs síns í einkasamtali við eiganda Hublot, svissnesks úraframleiðanda.

Hann gerði sér hins vegar ekki grein fyrir því að orð hans myndu rata í fjölmiðla. „Ég er með lið en engan framherja,“ sagði Mourinho í samtalinu.

„Vandamálið hjá Chelsea er að okkur vantar markaskorara. Við erum reyndar með einn [Samuel Eto'o] en hann er 32 ára. Kannski er hann 35 ára - hver veit?“

Samtalið átti sér stað í síðustu viku en Mourinho sótti þó samkomu sem var skipulögð af Hublot. Myndskeiðið var svo birt í gær en síðar fjarlægt af heimasíðu Canal Plus.

Mourinho er vitanlega æfur vegna þessa en hann þarf vafalítið að taka á málinu innan sinna herbúða - ekki síst gagnvart sóknarmönnunum Eto'o, Fernando Torres og Demba Ba.