Balotelli sagður færast nær Arsenal

Mario Balotelli, sóknarmaðurinn skrautlegi, hefur verið orðaður við Arsenal í enskum fjölmiðlum.

Enska blaðið Mirror hélt því fram að Arsenal stæði til boða að kaupa kappann frá AC Milan en Arsene Wenger, stjóri félagsins, er sagður reiðubúinn að borga 25 milljónir punda fyrir kappann.

Balotelli skoraði sigurmark Ítalíu gegn Englandi í fyrsta leik liðanna á HM í Brasilíu en forráðamenn AC Milan eru sagðir viljugir að selja kappann til að létta á fjárhagsvandræðum félagsins.

Monaco í Frakklandi hefur einnig veirð nefnt til sögunnar en fullyrt er að Wenger hafi lengi haft augastað á kappanum.