Dzeko: Þetta snýst alltaf um fyrsta markið í svona leik

Bosníumaðurinn Edin Dzeko reyndist Manchester City mikilvægur í kvöld þegar hann braut ísinn eftir rúmlega klukkutíma leik og skoraði tvö fyrstu mörkin í 4-0 sigri á Aston Villa.

„Við spiluðum góðan fótbolta í fyrri hálfleiknum og þeir sköpuðu sér ekki neitt. Stjórinn sagði okkur bara við okkur í hálfleik að halda ró okkar og þá myndum við fá það sem við vonuðumst eftir," sagði Edin Dzeko við Sky Sports eftir leikinn.

Manchester City er nú með tveggja stiga forystu á Liverpool fyrir lokaumferðina og frábær markatala liðsins þýðir City-liðinu nægir í raun jafntefli á heimavelli á móti West Ham til þess að tryggja sér Englandsmeistaratitilinn.

„Þegar lið verst á móti þér með tíu menn í teignum þá snýst þetta alltaf um fyrsta markið. Um leið og það datt inn þá opnaðist þetta allt fyrir okkur. Lokatölurnar láta þetta líta út sem auðveldan sigur en hann var það ekki," sagði Edin Dzeko.

„Við verðum að einbeita okkur að sunnudeginum. Við kláruðum okkar verkefni í dag en þetta verður mjög erfiður leikur um næstu helgi. Við búum samt af reynslunni frá því fyrir tveimur árum og munum nálgast þennan leik öðruvísi en þá," sagði Dzeko.

Manchester City tryggði sér þá titilinn með tveimur mörkum undir lok leiksins þegar allt leit út fyrir að liðið væri að missa titilinn yfir til Manchester United.