Manchester City skoraði fjögur mörk í seinni og fór á toppinn | Myndband

Manchester City er komið með aðra höndina á Englandsmeistaratitilinn eftir 4-0 stórsigur á Aston Villa á Ethiad-leikvanginum í ensku úrvalsdeildinni í kvöld.

Bosníumaðurinn Edin Dzeko skoraði tvö fyrstu mörkin fyrir City-liðið en mörkin komu með sátta mínútna millibili um miðjan seinni hálfleikinn. Síðustu tvö mörkin komu síðan undir lok leiksins.

Það tók Manchester City 64 mínútur að brjóta ísinn en mörkin duttu fljótlega inn eftir að knattspyrnustjórinn Manuel Pellegrini bætti viðmanni í sóknina. Manchester City liðið missti aldrei þolinmæðina þótt að lítið hafi gengið í fyrri hálfleiknum og eftir að mörkin duttu inn var sigur liðsins aldrei í hættu.

City-menn eru nú með tveggja stiga forystu á Liverpol fyrir lokaumferðina auk þess að vera með mun betri markatölu en City tekur á móti West Ham í síðustu umferðinni um næstu helgi.

Edin Dzeko skoraði fyrra markið sitt á 64. mínútu eftir flottan undirbúning David Silva og stoðsendingu frá Pablo Zabaleta.

Dzeko bætti síðan við öðru marki af stuttu færi á 72. mínútu þegar hann fylgdi eftir skoti Samir Nasri. Sigur Manchester City var ekki í hættu eftir þetta.

Stevan Jovetic skoraði þriðja markið á 89. mínútu eftir undirbúning Yaya Toure og Yaya Toure skoraði síðan fjórða markið sjálfur eftir mikinn sprett í uppbótartíma leiksins. Þetta var tuttugasta mark Yaya Toure á leiktíðinni.