Rooney: Suarez er í sama flokki og Messi og Ronaldo

Man. Utd tekur á móti Liverpool á morgun í stórleik helgarinnar í enska boltanum. Wayne Rooney, leikmaður Man. Utd, veit hvað hans lið þarf að passa í leiknum.

Það er Luis Suarez en hann hefur skorað 24 mörk í vetur og hefur náð einstaklega vel saman við Daniel Sturridge.

"Fyrir mér er Suarez uppi með Messi og Ronaldo í flokki bestu leikmanna heims. Hann hefur verið ótrúlegur og framherjaparið verið sjóðheitt. Við verðum að stöðva þá," sagði Rooney en Liverpool er búið að skora 27 mörkum meira en Man. Utd í deildinni.

"Bæði Suarez og Sturridge eru frábærir leikmenn. Ég gleðst yfir því að sjá Sturridge ganga vel þar sem hann fékk aldrei almennilegt tækifæri hjá fyrri félögum.

"Brendan Rodgers gaf honum tækifæri og hann hefur heldur betur nýtt það tækifæri. Það er líka gott fyrir enska landsliðið."