Arsenal fór létt með Newcastle og er á leið í Meistaradeildina

Arsenal er á hraðleið í Meistaradeildina eftir auðveldan 3-0 sigur á Newcastle á heimavelli í kvöld í 36. umferð ensku úrvalsdeildarinnar í fótbolta.

Franski miðvörðurinn Laurent Koscielny kom Arsenal yfir á 26. mínútu með marki af stuttu færi eftir aukaspyrnu Spánverjans Santi Cazorla en Arsenal-liðið var miklu betri aðilinn í leiknum.

Mesut Özil tvöfaldaði forskotið á 42. mínútu og framherjinn Oliver Giroud skoraði svo þriðja markið fyrir heimamenn á 66. mínútu. Afskaplega létt hjá Arsenal í kvöld.

Þar með er baráttunni um fjórða sætið, því síðasta sem gefur þátttökurétt í Meistaradeildinni næsta vetur, lokið þó Everton eigi enn tölfræðilega möguleika.

Arsenal er með 73 stig í fjórða sæti, fjórum stigum á undan Everton sem klikkaði alveg á lokametrunum en það tapaði 2-0 fyrir Southampton um helgina þar sem liðið skoraði tvö sjálfsmörk.

Everton á eftir leiki gegn Manchester City og Hull en Arsenal mætir mætir West Bromwich og Norwich í lokaumferðunum.