Lallana: Erum að komast í gang

Adam Lallana, miðjumaður Liverpool, segir liðið vera að komast í gang eftir góða frammistöðu þess gegn Arsenal í gær.

Martin Skrtel tryggði Liverpool jafntefli með skallamarki á sjöttu mínútu í uppbótartíma, en Liverpool-liðið spilaði vel í leiknum og var meira með boltann.

„Ég er virkilega svekktur með að við höfum ekki náð í öll stigin. Okkur leið samt vel með frammistöðuna og andrúmsloftið í kringum liðið. Þetta hefur verið að batna í síðustu leikjum,“ segir Lallana við heimasíðu Liverpool.

Liverpool er án sigurs í þremur síðustu leikjum liðsins í úrvalsdeildinni og er í ellefta sæti deildarinnar eftir 17 umferðir.

„Okkur finnst við vera að snúa þessu við og smám saman ná upp takti í okkar leik. Jöfnunarmarkið var mikilvægt fyrir okkur því við hefðum verið afar vonsviknir að fá ekkert út úr þessu. En stig er stig og frammistaðan var góð,“ segir Lallana.