Rússar mótmæltu hernaðarbrölti í Úkraínu

Þúsundir Rússa komu saman á strætum St. Pétursborgar og Moskvu til að mótmæla stríðsrekstri rússneskra stjórnvalda í austurhluta Úkraínu.

Kröfur mótmælenda voru að Rússar kölluðu heri sína til baka og stilltu til friðar í landinu. Rúmlega þrjú þúsund manns hafa látið lífið í átökum milli stríðandi fylkinga í héruðunum Donetsk og Luhansk síðan í apríl.

Úkraínustjórn hafa sakað Rússa um að afhenda aðskilnaðarsinnum á bandi Rússlandsstjórnar vopn og að hafa sent rússneska hermenn inn í héruðin Donetsk og Luhansk. Rússnesk stjórnvöld hafa hins vegar hafnað öllum slíkum ásökunum.

Að sögn lögreglunnar í Moskvu tóku um 5000 manns þátt í mótmælunum í höfuðborginni en skipuleggjendur mótmælanna segja fjöldann nær 40 þúsund.

Yelena Volkova, einn mótmælendanna í Moskvu, sagði að markmiðið með göngunni væri að sannfæra stjórnvöld um að hætta þessu „leynistríði“ sem þau neita að gangast við að sé í gangi.

Skilti og fánar í göngunni voru áletruð með slagorðum á borð við „Ég hef fengið nóg af lygunum þínum, Pútín“ og „Ég vil ekki heyja stríð við Úkraínu“.

Hópur stuðningsmanna Pútíns og rússneskra stjórnvalda mótmæltu aðgerðum kröfugöngunnar en ekki koma til átaka á milli hópanna svo nokkru næmi.

Alþjóðlega friðardaginn er haldinn hátíðlegur víðsvegar um heim í dag. Sambærilegar göngur fóru fram í öðrum rússneskum borgum sem og í Prag, Berlín og San Francisco.

Ríkisstjórnin í Úkraínu og aðskilnaðarsinnar sammæltust í gær um friðaráætlun til að binda endi á átökin.