Stjórnarherinn í Úkraínu herðir sókn

Stjórnarherinn í Úkraínu hefur ákveðið að setja aukinn þunga í árásirnar gegn aðskilnaðarsinnum sem nú ráða yfir borginni Donetsk í austurhluta Úkraínu. Þrír féllu og fimm særðust í átökunum í nótt og nokkur íbúðarhús gjöreyðilögðust.

Sameinuðu þjóðirnar lýstu yfir áhyggjum sínum í gær og telja að átökin muni hafa áhrif á um fjórar milljónir almennra borgara í landinu. Um 740 þúsund hafa flúið svæðið og um 118 þúsund eru nú á vergangi. Skortur er á öllum nauðsynjavörum og litla læknisaðstoð að fá þar sem um 70 prósent allra heilbrigðisstarfsmanna hafa flúið svæðið.

Fulltrúi Bandaríkjanna í öryggisráði Sameinuðu þjóðanna sagði á fundi þeirra á þriðjudag að besta lausnin til að stöðva átökin væri að Rússar hætti að styðja úkraínska aðskilnaðarsinna og hætti að senda þeim vopn.

Tæplega 1.400 manns hafa fallið í átökunum sem hófust í vor og yfir 4.000 eru særðir.

Búið er að jafna heilu hverfin við jörðu.