Giggs og félagar töpuðu fyrir Salford

Úrvalslið hins svokallaða '92 árgangs tapaði fyrir Salford City með fimm mörkum gegn einu í æfingaleik í gærkvöldi. Ryan Giggs skoraði eina mark úrvalsliðsins úr vítaspyrnu.

Giggs, Paul Scholes, Nicky Butt og Gary og Phil Neville léku allir með úrvalsliðinu í gær, en þeir spiluðu á sínum tíma saman í unglingaliði Manchester United og unnu síðar fjölda titla með aðalliði félagsins. David Beckham er einnig hluti af þessum hóp, en hann lék ekki með í gær.

Fleiri þekktir kappar léku með úrvalsliðinu í gær. Þar má m.a. nefna Raimond van der Gouw, Mikael Silvestre, David May og QuintonFurtone, fyrrverandi leikmenn Manchester United, grínistann Jack Whitehall og krikket-leikmennina Michael Vaughan og Steve Harmison.

Auk þess léku fyrrum samherjar Giggs og félaga í unglingaliði United, Robbie Savage, Raphael Burke, John O'Kane og Ben Thornley, með úrvalsliðinu í gær.

Þeir áttu hins vegar ekki mikla möguleika gegn Salford, sem er utandeildarlið sem Giggs, Scholes, Butt og Neville-bræðurnir festu kaup á í fyrra.

Giggs stýrði Manchester United undir lok síðustu leiktíðar, en hann fékk Butt, Scholes og Phil Neville sér til aðstoðar.

Síðasta haust var heimildarmynd um umræddan hóp, The Class of '92, frumsýnd, en hún fékk fínar viðtökur.