Blackpool aflýsti æfingaferð vegna manneklu

Forráðamenn enska B-deildarliðsins Blackpool hafa hætt við fyrirhugaða æfingaferð liðsins til Spánar þar sem að aðeins átta leikmenn eru samningsbundnir félaginu.

Alls fóru 27 leikmenn frá félaginu í lok síðustu leiktíðar og erfiðlega hefur gengið að semja við nýja leikmenn. Því var ákveðið að hætta við ferðina en spila átti tvo æfingaleiki í henni.

„Stjórinn tók þessa ákvörðun og er ég sammála henni. Við verðum að einbeita okkur að því að klára þá samninga sem við höfum verið að vinna í,“ sagði Karl Oyston, stjórnarformaður félagsins.

Sem stendur er enginn markvörður samningsbundinn félaginu en fyrsti leikur liðsins í ensku B-deildinni verður gegn Nottingham Forest þann 9. ágúst.

Jose Riga tók við sem knattspyrnustjóri félagsins í síðasta mánuði en liðið hafnaði í 20. sæti ensku B-deildarinnar í vor.