Ekkert verður úr félagsskiptum Moreno

Sevilla hefur ákveðið að slíta viðræðum við Liverpool um kaup Liverpool á Alberto Moreno, vinstri bakverði liðsins. Þetta staðfesti yfirmaður knattspyrnumála félagsins, Ramon Rodriguez Verdejo, við Marca.

„Félögin reyndu að komast að samkomulagi en ég held að það náist einfaldlega ekki úr þessu. Þeir gerðu tilboð sem við teljum ekki nægilega gott og við ætlum ekki að gefa neinn afslátt af neinum leikmönnum.“

Liverpool er á höttunum eftir vinstri bakverði til að leysa stöðu sem hefur verið til vandræða í langan tíma hjá félaginu. José Enrique eyddi mest öllu síðastliðnu tímabili meiddur og þá stóð Aly Cissokho engan vegin undir væntingum. Þurfti hægri bakvörðurinn Jon Flanagan að leysa stöðuna af en talið er að Brendan Rodgers, framkvæmdarstjóri Liverpool, vilji leysa vandamálið endanlega.

„Hann er aðeins 21 árs gamall og á eftir að taka gríðarlegum framförum og verða landsliðsbakvörður. Við myndum sennilega taka einhverju fáránlegu tilboði en við þurfum ekki að selja lengur eftir söluna á Ivan Rakitic til Barcelona,“ sagði Ramon.