Staðfesti áhuga Liverpool á Moreno

Forseti spænska félagsins Sevilla staðfesti í dag áhuga Liverpool á bakverðinum Alberto Moreno og mun klúbburinn ekki standa í veg fyrir honum komi ásættanlegt tilboð frá Englandi.

Moreno sem er 21 árs var í 30 manna undirbúningshóp Spánverja fyrir HM en komst ekki í lokahópinn. Hann hefur verið orðaður við ýmis stórlið undanfarnar vikur og er talið að hann sé efst á óskalista Liverpool.

Liverpool lenti í miklum vandræðum með vinstri bakvarða stöðuna á tímabilinu þegar landi Moreno, Jose Enrique meiddist snemma á tímabilinu. Aly Cissokho stóðst engan vegin væntingar sem til hans voru gerðar og neyddist Liverpol til að spila hægri bakverðinum Jon Flanagan þar.

Flanagan stóð vakt sína vel en hann er hægri bakvörður að upplagi og er talið að Liverpool sjái langtíma lausn á vinstri bakvarða stöðunni en hún hefur verið lengi til vandræða hjá rauða hernum.

"Það er rétt að Liverpool hefur áhuga á Moreno en hvert næsta skref er ekki víst. Við munum ekki neyða Moreno til þess að halda áfram hjá Sevilla en það þýðir ekki að hann fari ódýrt. Félagið er vel stætt fjárhagslega og við höldum okkur við okkar verðmat á leikmönnunum," sagði Jose Castro, forseti Sevilla, í samtali við sjónvarpstöð félagsins.

Annar leikmaður liðsins, Ivan Rakitic hefur einnig verið orðaður við brottför undanfarnar vikur og hafa félög á borð við Manchester United, Real Madrid og Barcelona verið nefnd í því samhengi.