Rooney á vinstri kantinum í kvöld

England mætir Ekvador í vináttulandsleik á Sun Life-vellinum í Miami í kvöld klukkan 19.00, en leikurinn verður í beinni útsendingu á Stöð 2 Sport 3.

Roy Hodgson ætlar að prófa sig áfram með nýja hluti í leiknum, en fastlega er búist við að Wayne Rooney verði á vinstri kantinum. Hann spilar annan landsleikinn í röð til að koma sér í betra leikform, en Rooney er að komast í gang eftir nárameiðsli.

Rooney er ekki óvanur því að spila vinstra megin, en það þurfti hann oft að gera með Manchester United í Meistaradeildinni fyrir nokkrum árum. Hann kvartaði svo yfir því í samtali við breska blaðamenn árið 2009.

„Hann getur algjörlega leyst þessa stöðu. Wayne er góður leikmaður að því leyti að það þarf ekkert að festa hann í einhverja eina stöðu. Hann getur spilað sem framherji, beint fyrir aftan framherjann og á kantinum,“ segir Hodgson.

„Wayne hefur gert þetta allt með Manchester United og er það er engin ástæða fyrir því að ég geti ekki notað hann í þessum stöðum líka,“ segir Roy Hodgson.

Frank Lampard verður fyrirliði Englands í kvöld í sínum 104. landsleik og James Milner byrjar í stöðu hægri bakvarðar.

Alex Oxlade-Chamberlain, leikmaður Arsenal, og United-maðurinn Phil Jones verða væntanlega líka í byrjunarliðinu í kvöld og þá tekur Luke Shaw stöðu LeightonBaines í vinstri bakverðinum.