Bobby Charlton: England getur ekki unnið HM

Sir Bobby Charlton, fyrrverandi leikmaður Manchester United og heimsmeistari með enska landsliðinu, segir England ekki geta unnið HM í Brasilíu.

Charlton var í enska liðinu sem vann HM á heimavelli árið 1966. Honum finnst skortur á heimsklassa leikmönnum hjá Englandi í dag og er enn fremur á þeirri skoðun að engin Evrópuþjóð geti unnið HM í ár.

„Þó ég telji að England geti ekki unnið HM verður það sér ekki til skammar,“ segir Charlton en mikið af ungum og spennandi leikmönnum fá tækifæri með Englandi í Brasilíu.

„Hvaða ungur leikmaður sem er myndi stökkva á tækifærið að spila á HM því það gæti aldrei gerst aftur. Það sem veldur mér áhyggjum er skortur á heimsklassa leikmönnum í enska liðinu. Fabio Capello talaði um þetta fyrir fjórum árum.“

„Það er ótrúlegt, að mér finnst, að England, með alla sína merku sögu, geti ekki safnað saman nóg af góðum leikmönnum fyrir stórmót. Ég hef áhyggjur af þessu.“

„Ég er mjög ánægður með suma ungu strákana sem eru að koma upp en ég get ekki sagt að ég haldi að England eigi möguleika á að vinna HM,“ segir Bobby Charlton.