McDermott yfirgefur Leeds

Leeds United og Brian McDermott hafa komist að sameiginlegri niðurstöðu um að McDermott hætti sem knattspyrnustjóri félagsins sem leikur í Championship deildinni á Englandi, næst efstu deild.

McDermott tók við Leeds í apríl 2013 og hefur á einu ári farið í hálfgerða rússíbanareið með félaginu.

Í fyrstu gekk Leeds vel undir stjórn McDermott en í desember hrundi leikur liðsins og liðið féll hratt og örugglega niður töfluna.

Massimo Cellino sem keypti Leeds á vormánuðum reyndi að reka McDermott í janúar, áður en kaup hans á félaginu voru gengin í gegn en Cellino rak 36 stjóra hjá Cagliari á þeim 22 árum sem hann átti félagið.

McDermott hélt þó vinnunni og náði að halda liðinu í deildinni með ágætum úrslitum undir lok tímabilsins en liðið hafnaði í 15. sæti deildarinnar.

„Ég áttaði mig ekki á því hversu slæmar vinnuaðstæður hans voru og hversu mörg svikin loforð hann þurfti að vinna með fyrr en ég kom til að reyna að snúa gengi Leeds við,“ sagði Cellino í fréttatilkynningu um brotthvarf McDermott.

„Það hafa verið forréttindi að þjálfa þetta frábæra félag og ég hef notið áskoruninnar innilega,“ sagð McDermott í sömu fréttatilkynningu.

„Það er ljóst að Massimo vill gera breytingar á skipulagi félagsins og hann telur að hann muni vinna betur með þjálfara við stjórn liðsins heldur en framkvæmdarstjóra,“ sagði McDermott sem þakkaði leikmönnum, starfsmönnum og stuðningsmönnum fyrir samstarfið.