Umboðsmaður Toure staðfestir fýluna

Umboðsmaður Yaya Toure segir framferði forráðamanna Manchester City ógeðfellt en þeir óskuðu kappanum ekki til hamingju með afmælið á dögunum.

Dimitri Seluk, umboðsmaður Toure, var í viðtali hjá The Sun í morgun þar sem þetta kom fyrst fram. Fréttamenn BBC fengu ummælin svo staðfest hjá honum.

„Enginn þeirra [eigendanna] tóku í hönd hans á afmælisdaginn. Það er virkilega ógeðfellt,“ sagði Seluk og bætti við að Toure væri í miklu uppnámi vegna málsins.

„Hann fékk köku á afmælisdaginn en þegar Roberto Carlos átti afmæli fékk hann Bugatti [glæsibifreið] að gjöf frá eigendum Anzhi,“ bætti Seluk við en bætti við að Toure hefði ekki átt von á gjöf. Handaband hefði dugað.

Fram kemur í frétt BBC að fulltrúar liðsins vildu ekki tjá sig um málið en að eigendur félagsins hefðu ekki miklar áhyggjur af því. Toure var einn allra besti leikmaður City á nýliðinni leiktíð er City tryggði sér enska meistaratitilinn.

Seluk sagði að Toure hefði líka verið óánægður síðastliðið sumar en hann skrifaði síðan undir nýjan fjögurra ára samning.