Welbeck sendir Moyes kaldar kveðjur

Danny Welbeck, framherji Manchester United og enska landsliðsins, viðurkenndi um helgina að hafa ekki notið þess að spila undir stjórn David Moyes.

Moyes sem var knattspyrnustjóri Manchester United gagnrýndi Welbeck opinberlega fyrr í vetur fyrir að æfa ekki nægilega mikið.

„Þetta kom mér á óvart. Þegar hann sagði þetta var ég sífellt eftir æfingar á auka æfingum sem hann tók eflaust ekki eftir. Ég reyndi að vinna í hlutum sem ég get bætt mig í, bæði á vellinum og í lyftingarsalnum,“

Welbeck hefur gengið betur með enska landsliðinu en með félagsliði sínu og taldi hann einfalda skýringu þar á bak við. Welbeck spilar yfirleitt sem kantmaður hjá félagsliði sínu en hann fær yfirleitt meira frelsi með enska landsliðinu.

„Ég vill spila ákveðna stöðu og hef ekki fengið að spila sem fremsti maður hjá United. Öllum leikmönnum finnst óþæginlegt að spila í annarri stöðu og það verður þreytandi að spila sífellt í öðrum stöðum.“

„Ég vill spila sem fremsti maður og það er kominn tími til þess að ég geri það. Ég er að skora fleiri mörk með enska landsliðinu því þar fæ ég meira frelsi og ég þarf ekki að verjast jafn mikið,“ sagði Welbeck sem hefur verið orðaður við Tottenham og Arsenal undanfarnar vikur.