Allardyce ætlar hátt með West Ham

Sam Allardyce knattspyrnustjóri West Ham í ensku úrvalsdeildinni í fótbolta hefur mikinn metnað fyrir því að lyfta félaginu á hærri stall og vinna titla fyrir félagið. Hann ætlar að byrja á að skemma fyrir Manchester City á morgun.

„Ég vil komast í Evrópu. Ég vil flytja inn á nýja leikvanginn. Ég vil vinna bikar. Ef ég hefði ekki metnað þá væri ég ekki í þessu starfi,“ sagði Sam Allardyce á blaðamannafundi vegna leiks West Ham og Manchester City í Manchester á morgun.

„Ég hef mikinn metnað. Getur West Ham fullnægt metnaði mínum? Það kemur að því já. Það fer eftir því hvort allir hafi þolinmæði til bíða eftir að við náum þeim árangri. Það er vandamálið í dag, skortur á þolinæði.“

West Ham flytur á nýjan heimavöll árið 2016, ólympíuleikvanginn í Lundúnum en Allardyce er ekki bjartsýnn á að vera stjóri liðsins þegar að því kemur þrátt fyrir að fundur hans með David Sullivan, stjórnarformanni og stærsta eiganda félaginsins, hafi ekki gefið neitt annað til kynna en að starf hans sé öruggt.

„Meðal líftími knattspyrnustjóra í starfi er 13 mánuðir og því er ekki raunhæft að ég verði hér enn á þeim tímapunkti. Það hafa aldrei verið meiri stjórabreytingar í úrvalsdeildinni og þú veist aldrei hvað verður um þig.

„Þetta félag var í næst efstu deild þegar ég kom og ég hef náð þeim árangri sem farið var fram á. Ég gerði það sem Gus Poyet gerði hjá Sunderland en það var fyrir sex, sjö vikum síðan. Ef ég hefði gert það núna væru allir að hrósa mér núna,“ sagði Allardyce.

Ætlar að skemma fyrir CityWest Ham er í 12. sæti deildarinnar og getur ekki komist ofar en liðið sækir Manchester City heim á morgun í loka umferðinni þar sem City getur með sigri tryggt sér meistaratitilinn.

„Leikmenn mínir geta farið út og gert sitt besta vitandi að sæti okkar í deildinni er öruggt, við förum því út til að skemma fyrir City.“