Við höfum aldrei rifist eins mikið

Nemanja Vidic er búinn að kveðja Man. Utd og hann segir mikið hafa gengið á hjá félaginu á erfiðu tímabili sem var að ljúka.

Vidic, sem fer til Inter í sumar, segir að ekki megi bara kenna David Moyes um lélegt gengi United í vetur. Hann segir leikmenn aldrei hafa rifist jafn mikið  og í vetur.

Serbin sterki spilaði átta og hálft ár með Man. Utd og vann fjölda titla. Hann vildi ekki enda ferilinn hjá félaginu með svona tímabili.

"Það voru auðvitað breytingar þegar Ferguson hætti og inn kemur maður með nýjar hugmyndir.  Ryan Giggs hefur sömu hugmyndir og Ferguson um fótbolta og nálgaðist verkefnið á svipaðan hátt. Leikmenn þekkja það og leið vel," sagði Vidic um lokaleikina með Giggs.

"Ég er ekki að segja að leið David Moyes hafi verið slæm en þessum leikmönnum líður betur að spila fótbolta á þann hátt sem Ferguson predikaði. Það þarf samt að bera virðingu fyrir því sem maður er að gera og til lítils að tala um einhvern sem var hér þegar annar maður er kominn.

"Moyes reyndi eins og hann gat. Hann var fagmannlegur í sinni vinnu og vildi svo innilega ná árangri. Það gerðist því miður ekki og það eru allir fúlir yfir því."

Það var talsvert skrifað um að eldri leikmenn liðsins hefðu grafið undan Moyes. Hann segir það ekki vera satt.

"Menn efuðustu um sjálfan sig en aldrei um stjórann. Við erum vanir að berjast um titla fram á síðasta dag og það var erfitt að takast á við mótlætið.

"Við rifumst mikið og aldrei eins mikið og á þessu tímabili. Menn sýndu að þeim var ekki sama. Við rifumst því við vildum verða betri. Það hefði eitthvað verið að ef við hefðum ekki rifist og öllum væri sama."