Meistarar Manchester City munu ná sér í nýja leikmenn

Ferran Soriano, framkvæmdastjóri Manchester City, gaf það út í viðtali við Manchester Evening News að nýir leikmenn muni bætast við meistaralið Manchester City fyrir næsta tímabil.  

Bacary Sagna, bakvörður Arsenal, hefur verið orðaður við liðið en hann verður samningslaus í sumar. Porto-mennirnir Eliaquim Mangala og Fernando gætu einnig verið á leiðinni til bláa hluta Manchester.

„Við erum búnir að plana þetta. Við gerum þetta ekki endilega í sumar en við munum klára þetta á þessu ári," sagði Ferran Soriano í viðtali við Manchester Evening News.

„Við vitum að einhverjir leikmenn eru að fara af því að samningar þeirra eru að klárast. Við ætlum líka að fá til okkar nýja leikmenn þó að kjarni liðsins verði áfram sá sami," sagði Soriano.

„Það eru þessir leikmenn sem eru að vinna. Ekki gleyma því að við höfum aðeins verið eitt ár með Manuel Pellegrini og ég er því viss um að næsta ár verður enn betra," sagði Soriano.

„Það tekur tíma að byggja upp lið. Það verða því einhverjar breytingar hjá okkur en engar stórar," sagði Soriano.