Sturridge vongóður fyrir helgina

Daniel Sturridge, leikmaður Liverpool, stefnir að því að ná leiknum mikilvæga gegn Chelsea um helgina.

Liverpool er með fimm stiga forystu á toppi ensku úrvalsdeildarinnar og getur með sigri tekið stórt skref í átt að meistaratitlinum.

Sturridge hefur verið meiddur á vöðva aftan í læri og missti af 3-2 sigri liðsins gegn Norwich um síðustu helgi af þeim sökum.

„Vonandi kem ég til baka um helgina,“ sagði Sturridge. „Ég er ekki viss um hvort að ég verði í byrjunarliðinu eða ekki. Við verðum að sjá til.“

Sturridge lék áður með Chelsea og segir að hann beri virðingu fyrir sínu gamla félagi. „En ef ég skora sigurmark á lokamínútunni þá veit ég að ég mun ekki hemja mig,“ sagði hann.